ໃນຕອນເຊົ້າວັນທີ 16 ສິງຫາ ປີ 2019 ໄດ້ມີການຈັດພິທີເປີດຫຼັກສູດຝຶກອົບຮົມຫຼັກສູດໃຫ້ພະນັກງານວິຊາການ ດ້ານໄອຊີທີ ທີ່ ສູນພັດທະນາ ແລະ ຝຶກອົບຮົມດ້ານຊອບແວລາວ-ອິນເດຍ ທີ່ ສະຖາບັນເຕັກໂນໂລຊີ ການສື່ສານຂໍ້ມູນຂ່າວສານ, ກະຊວງ ໄປສະນີໂທລະຄົມມະນາຄົມ ແລະ ການສື່ສານ (ກະຊວງ ປທສ). ສູນພັດທະນາ ແລະ ຝຶກອົບຮົມດ້ານຊອບແວລາວ-ອິນເດຍ ແມ່ນໂຄງການຮ່ວມມືກັນລະຫວ່າງ ສະຖາບັນເຕັກໂນໂລຊີ ການສື່ສານ ຂໍ້ມູນຂ່າວສານ, ກະຊວງ ປທສ ແລະ ສູນ​ C-DAC (Centre for Development of Advanced Computing) ປະ​ເທດ​ອິນ​ເດຍ. ພິທີເປິດດັ່ງກ່າວເປັນນິມິດໝາຍອັນດີ ເປັນອີກບາດກ້າວໜຶ່ງທີ່ສຳຄັນ ໃຫ້ແກ່ການຮ່ວມມື ຂອງທັງສອງຝ່າຍ. ນອກຈາກນີ້ການກໍ່ສ້າງບຸກຄະລາກອນດ້ານໄອຊີທີ ແມ່ນເປັນນະໂຍບາຍຂອງກະຊວງ ປທສ, ຫຼັງຈາກທີ່ໄດ້ ມີການເປີດນຳໃຊ້ສູນ ຝຶກອົບຮົມຢ່າງເປັນທາງການໃນທ້າຍປີທີ່ຜ່ານມາ. ສູນດັ່ງກ່າວມີເປົ້າໝາຍໃນການສ້າງ ແລະ ພັດທະນາ ບຸກຄະລາກອນ ໃຫ້ມີຄວາມສາມາດ ໃນການພັດທະນາ ຊອບແວໃນລະດັບສູງ ເພື່ອສາມາດຕອບສະໜອງ ຄວາມຕ້ອງການ ຕົວຈິງໃນຍຸກປະຈຸບັນ ປະກອບສ່ວນເຂົ້າໃນວຽກງານ ການພັດທະນາເສດຖະກິດສັງຄົມ ຢ່າງຮອບດ້ານ ຕາມຍຸກສະໄໝ ທີ່ມີຄວາມ ຮຽກຮ້ອງຕ້ອງການສູງ.

ເປັນປະທານພິທີເປີດໂດຍ ທ່ານ ສາຍຝົນ ບຸດຈັນທະລາດ ຫົວໜ້າ ສະຖາບັນ ເຕັກໂນໂລຊີການສື່ສານ ຂໍ້ມູນຂ່າວສານ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ຕາງໜ້າຈາກ ບັນດາກົມ ອ້ອມຂ້າງ ກະຊວງ ປທສ, ​ລັດວິສາຫະກິດໃນຂະແໜງການໂທລະຄົມ ແລະ ບໍລິສັດເອກະຊົນຕ່າງໆ ໃນຂະແໜງການ ທີ່ກ່ຽວຂ້ອງ ກໍ່ໄດ້ເຂົ້າຮ່ວມ ພິທີ.

ໃນພິທີ ທ່ານ ສາຍຝົນ ບຸດຈັນທະລາດ ຫົວໜ້າ ສະຖາບັນ ເຕັກໂນໂລຊີການສື່ສານຂໍ້ມູນຂ່າວສານ ກະຊວງ ປທສ ໄດ້ມີຄຳເຫັນ ເຊິ່ງທ່ານໄດ້ຕີລາຄາສູງ ໃນການຮ່ວມມືກັນຂອງທັງສອງຝ່າຍລາວ-ອິນເດຍ ໃນການຈັດຕັ້ງ ປະຕິບັດ ການຝຶກອົບຮົມດັ່ງກ່າວ ເຊິ່ງຈະສາມາດ ປະກອບສ່ວນ ໃນການຍົກລະດັບພະນັກງານ ວິຊາການ ໃຫ້ມີຄວາມຮູ້, ຄວາມສາມາດ ທີ່ທັນສະໄໝ ແລະ ເປັນທີ່ຕ້ອງການຂອງຕະຫຼາດ.

ໃນເບື້ອງຕົ້ນຫຼັກສູດທີ່ຈະເລີ່ມເປີດການຝຶກອົບຮົມແມ່ນ ປະກອບມີ 2​ ຫຼັກສູດຄື: ຫຼັກສູດ ການສື່ສານຂໍ້ມູນ ແລະ ລະບົບ ເຄືອຂ່າຍ ແລະ ຫຼັກສູດ ເຕັກໂນໂລຊີຂໍ້ມູນຂ່າວສານ ເຊິ່ງທັງສອງຫຼັກສູດ ແມ່ນຈະສິດສອນໂດຍ ອາຈານຜູ້ຊ່ຽວຊານ ຈາກ ສູນ C-DAC ປະເທດອິນເດຍ. ແຕ່ລະຫຼັກສູດແມ່ນຈະໃຊ້ເວລາໃນການຝຶກ 200 ຫາ 320 ຊົ່ວໂມງ ເຊິ່ງຫຼັງຈາກຈົບຫຼັກສູດ ແມ່ນຈະໄດ້ຮັບໃບປະກາດຢັ້ງຢືນ ທີ່ອອກໃຫ້ໂດຍ ສູນ C-DAC ປະເທດອິນເດຍ. ໃນການຝຶກອົບຮົມຄັ້ງນີ້ ນອກຈາກ 2 ຫຼັກສູດທີ່ກ່າວມາດ້ານເທິງນັ້ນແລ້ວ ຍັງມີອີກ 6 ຫຼັກສູດ ຄື: Software Testing, Advanced Web Technology, Android Programming, IT Project Management, Ethical Hacking and Information Security ແລະ Linux System Administration ເຊິ່ງຄາດວ່າຈະສຳເລັດຫຼັກສູດ ທັງໝົດພາຍໃນເວລາ 1 ປີ.

ທາງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນເປີດໂອກາດໃຫ້ພາກສ່ວນຈາກພາຍນອກທີ່ສົນໃຈສາມາດເຂົ້າມາຕິດຕໍ່ພົວພັນເພື່ອເຂົ້າຮ່ວມ ຝືກອົບຮົມ ໄດ້ເຊັ່ນ ດຽວກັນ. ທ່ານໃດທີ່ສົນໃຈສາມາດຕິດຕໍ່ພົວພັນໄດ້ທີ່ ສະຖາບັນ ເຕັກໂນໂລຊີການສື່ສານຂໍ້ມູນຂ່າວສານ, ເບີໂທຕິດຕໍ່: 02058854888, 02059963000, http://iict.gov.la

 

Leave a Comment