ໃນຕອນເຊົ້າຂອງວັນທີ 16 ທັນວາ 2020, ໄດ້ມີການຈັດງານສະຫຼຸບວຽກ ແຜນ 5 ປີ ຄັ້ງທີ II (2016-2020) ແລະ ແຜນ 5 ປີ ຄັ້ງທີ III (2021-2025) ຂອງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ,​ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ພາຍໃຕ້ການເປັນປະທານຂອງ ທ່ານ ທອງໃສ ຊານໄຊຍະ, ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ). ໃນງານໄດ້ຮັບກຽດເຂົ້າຮ່ວມໂດຍທ່ານ ສາຍຝົນ ບຸດຈັນທະລາດ ຫົວໜ້າສະຖາບັນ ເຕັກໂນໂລຊີການສື່ສານຂໍ້ມູນຂ່າວສານ, ແຂກຮັບເຊີນ ຈາກບັນດາກົມປິ່ນອ້ອມພາຍໃນກະຊວງ ປທສ ພະນັກງານ-ຄູອາຈານ ແລະ ນັກສຶກສາພາຍໃນ ສະຖາບັນ ຢ່າງພ້ອມພຽງຮຽງໜ້າ.

          ໃນການສະຫຼຸບວຽກ ແຜນ 5 ປີ (2016-2020) ທ່ານ ສາຍຝົນ ບຸດຈັນທະລາດ, ຫົວໜ້າ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ກ່າວສະຫຼຸບເຖິງແຜນງານຕະຫຼອດໄລຍະ 5ປີທີ່ຜ່ານມາ (2016-2020) ເຊິ່ງສາມາດສ້າງບຸກຄະລາກອນໃຫ້ຂະແໜງການໄດ້ເຖິງ 996 ຄົນ, ມີການພັດທະນາຫຼັກສູດຢ່າງຕໍ່ເນື່ອງ ເພື່ອໃຫ້ມີເນື້ອຫາທີ່ທັນຍຸກສະໄໝ, ບວກກັບການຮ່ວມມືກັບພາກສ່ວນຕ່າງໆ ທັງພາຍໃນ ແລະ ຕ່າງປະເທດ ຢ່າງຕໍ່ເນື່ອງ. ພ້ອມດຽວກັນນັ້ນ ທ່ານຍັງໄດ້ອະທິບາຍເຖິງແຜນ 5ປີ ໃນຕໍ່ໜ້າອີກດ້ວຍ ເຊິ່ງໄດ້ເນັ້ນໜັກວຽກງານການພັດທະນາສື່ການຮຽນຮູ້ຕະຫຼອດຊີວິດ, ການລິເລີ່ມການຄົ້ນຄວ້າວິໄຈດ້ານ ໄອຊີທີ ເພື່ອໃຫ້ຂະແໜງມີການພັດທະນາແບບຕໍ່ເນື່ອງ, ການບົ່ມເພາະຜູ້ປະກອບການ    ໃໝ່ ຫຼື Start-up ເປັນຕົ້ນ. ສຸດທ້າຍ, ທ່ານຍໄດ້ຮຽກຮ້ອງໃຫ້ ພະນັກງານ-ຄູອາຈານ ແລະ ວິຊາການທຸກທ່ານ ສືບຕໍ່ມູນເຊື້ອທີ່ດີ ນອກຈາກວຽກງານການສ້າງບຸກຄະລາກອນແລ້ວ ຍັງຕ້ອງເປັນແບບຢ່າງ, ເປັນແນວໜ້າ ໃນການຊຸກຍູ້ ແລະ ສົ່ງເສີມການນຳໃຊ້ເຕັກໂນໂລຊີ ໄອຊີທີ ໃຫ້ເກີດຜົນປະໂຫຍດສູງສຸດ ທັງໃນການຈັດຕັ້ງປະຕິບັດໜ້າທີ່ການງານ, ຊີວິດສ່ວນຕົວ ໃຫ້ສາມາດປະກອບສ່ວນເຂົ້າໃນວຽກງານ ການພັດທະນາເສດຖະກິດ-ສັງຄົມ ຂອງຊາດ.

          ທ້າຍສຸດ, ທ່ານ ທອງໃສ ຊານໄຊຍະ, ຮອງລັດຖະມົນຕີ ກະຊວງໄປສະນີ,​ ໂທລະຄົມມະນາຄົມ ແລະ ການສື່ສານ ໄດ້ມີຄຳເຫັນ ແລະ ໃຫ້ທິດຊີ້ນຳໃນທີ່ປະຊຸມ ໂດຍໄດ້ຕີລາຄາສູງເຖິງຜົນສຳເລັດທີ່ຫຼວງຫຼາຍ ໃນການຈັດຕັ້ງປະຕິບັດວຽກໃນໄລຍະ 5 ປິຜ່ານມາຂອງ ສະຖາບັນ ພ້ອມໄດ້ເນັ້ນໃຫ້ຄະນະນຳ ແລະ ພະນັກງານຄູອາຈານ ພາຍໃນສະຖາບັນ ສືບຕໍ່ຕັ້ງໜ້າຈັດຕັ້ງປະຕິບັດ ວຽກງານການສ້າງ ແລະ ພັດທະນາບຸກຄະລາກອນຂອງຕົນໃຫ້ມີຄຸນນະພາບສູງ ພ້ອມຕອບໂຈດຂອງຄວາມຮຽກຮ້ອງຕ້ອງການຂອງສັງຄົມ ໃຫ້ສາມາດປະກອບສ່ວນເຂົ້າໃນວຽກງານການພັດທະນາ ເສດຖະກິດ-ສັງຄົມ ແລະ ຂະບວນການ ການຫັນເປັນດິຈິຕອນຂອງປະເທດຊາດເຮົາ.