ໃນຕອນເຊົ້າຂອງວັນທີ 25 ເມສາ 2022 ເຊິ່ງເປັນວັນທີ່ມີຄວາມໝາຍ-ຄວາມສໍາຄັນ ກົງກັບວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 61 ປີ (25 ເມສາ 1961 – 25 ເມສາ 2022) ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ໄດ້ມີການຈັດພິທີວາງສີລາລືກ ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ດ້ວຍທຶນຊ່ວຍເຫຼືອລ້າຈາກລັດຖະບານ ສາທາລະນະລັດ ປະຊາຊົນຈີນ. ໃຫ້ກຽດເຂົ້າຮ່ວມເປັນກິຕິມະສັກໂດຍ ທ່ານ ບັນດິດ ສາດສະດາຈານ ບໍ່ວຽງຄໍາ ວົງດາລາ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ທ່ານ ຈຽງ ຈ່າຍຕົງ ເອກອັກຄະລັດຖະທູດ ສາທາລະນະລັດ ປະຊາຊົນຈີນ ປະຈໍາ ສາທາລະນະລັດ ປະຊາທິປະໄຕ ປະຊາຊາຊົນລາວ. ນອກນັ້ນຍັງມີບັນດາທ່ານ ຈາກຄະນະກຳມະການຮ່ວມມື ລາວ-ຈີນ, ຄະນະກົມພາຍໃນກະຊວງເຕັກໂນໂລຊີ ແລະ ການສື່ສານ,​ ຄູອາຈານ ພາຍໃນສະຖາບັນ,​ ບໍລິສັດຜູ້ຮັບເໝົາລວມໂຄງການ,​ ທີ່ປຶກສາໂຄງການ ແລະ ສື່ມວນຊົນ ກໍ່ໄດ້ເຂົ້າຮ່ວມໃນພິທີດັ່ງກ່າວ.

ເພື່ອຜັນຂະຫຍາຍ ແລະ ການໂຄສະນາ ສາຍສຳພັນການພັດທະນາເສດຖະກິດ ແລະ ການຄ້າ ລະຫ່ວາງສອງປະເທດລາວຈີນ-ຈີນລາວ ຕາມແລວທາງ “ໜຶ່ງແລວໜຶ່ງເສັ້ນທາງ”, ໂຄງການສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນເປັນການຈັດຕັ້ງປະຕິບັດຕາມແນວຄິດລິເລີ່ມຂອງແນວທາງ “ໜຶ່ງແລວໜຶ່ງເສັ້ນທາງ” ແຫ່ງ ສາທາລະນະລັດ ປະຊາຊົນຈີນ. ໂຄງການດັ່ງກ່າວແມ່ນໂຄງການອອກແບບກໍ່ສ້າງສູນຝຶກອົບຮົມດ້ານໄອຊີທີ 5 ຊັ້ນ ຈຳນວນ 1 ຫຼັງ ໂດຍມີເນື້ອທີ່ໃຊ້ສອຍທັງໝົດ 5,524.56 ຕາແມັດ ປະກອບດ້ວຍຫ້ອງຮຽນທຳມະດາ, ຫ້ອງຮຽນທັນສະໄໝ, ຫ້ອງທົດລອງ, ຫ້ອງການ, ຫ້ອງສະໝຸດ, ຫ້ອງປະຊຸມໃຫຍ່ ເປັນຕົ້ນ. ໃນອາຄານແມ່ນຈະປະກອບດ້ວຍອຸປະກອນການຮຽນ-ການສອນ ທີ່ຈຳເປັນ, ອຸປະກອນຫ້ອງທົດລອງ ແລະ ສິ່ງອຳນວຍຄວາມສະດວກໃນການສອບເສັງ. ພາຍຫຼັງໂຄງການລິເລີ່ມການ ກໍ່ສ້າງ, ຄູອາຈານ ແລະ ນັກສຶກສາ ຈໍານວນ 312 ຄົນ ຈະໄດ້ຮັບການຝຶກອົບຮົມ ແລະ ສອບເສັງວັດລະດັບໃນ 4 ຫຼັກສູດ ເພື່ອກຽມພ້ອມຮອງຮັບໃນການເປີດສູນ. ໃນນັ້ນຜູ້ບໍລິຫານລະດັບສູງ ຈຳນວນ 20 ທ່ານ ແມ່ນຈະໄດ້ຮັບເຊີນເຂົ້າຮ່ວມການຝຶກອົບຮົມ ‘ຜູ້ບໍລິຫານຂັ້ນສູງ’ ທີ່ ສປ ຈີນ ເປັນເວລາ 5 ວັນ ອີກດ້ວຍ.

ໂຄງການສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນໂຄງການຊ່ວຍເຫຼືອລ້າຈາກລັດຖະບານ ສາທາລະນະລັດ ປະຊາຊົນຈີນ ດ້ວຍມູນຄ່າສູງສຸດເຖິງ 85.72 ລ້ານຢວນ ເຊິ່ງໄດ້ມີການລິເລີ່ມເກັບກໍາຂໍ້ມູນ ແລະ ສໍາຫຼວດສຶກສາຄວາມເປັນໄປໄດ້ໂດຍ ສະຖາບັນອອກແບບວິສະວະກໍາເອເລັກໂຕຣນິກ ສາທາລະນະລັດ ປະຊາຊົນຈີນ ລະຫວ່າງວັນທີ 27 ມີນາ 2019 ຫາ 17 ເມສາ 2019. ໂຄງການດັ່ງກ່າວ ເປັນໂຄງການທຳອິດ ທີ່ດຳເນີນການໃນຮູບແບບ ຝ່າຍລາວຈັດຕັ້ງປະຕິບັດເອງຄື: ຝ່າຍລາວມີໜ້າທີ່ຮັບຜິດຊອບໃນການສໍາຫຼວດອອກແບບ ແລະ ຄັດເລືອກເອົາຜູ້ຮັບເໝົາລວມໂຄງການຈາກບັນຊີບໍລິສັດຈີນ. ຄະນະຈັດຕັ້ງປະຕິບັດໂຄງການໄດ້ຄັດເລືອກບໍລິສັດທີ່ມີຄວາມພ້ອມທາງດ້ານເຕັກນິກ ແລະ ຖືກຕ້ອງຕາມເງື່ອນໄຂທີ່ກຳນົດໄວ້ ໂດຍແມ່ນ ກຸ່ມບໍລິສັດກໍ່ສ້າງທາງລົດໄຟ ແຫ່ງ ສາທາລະນະລັດ ປະຊາຊົນ ຈີນ ຈໍາກັດ (China Railway Construction Group Co., Ltd) ໄດ້ຖືກຄັດເລືອກໃຫ້ເປັນຜູ້ຊະນະການປະມູນໂຄງການ, ໂດຍຄາດຄະເນວ່າ ຈະສຳເລັດການກໍ່ສ້າງ ແລະ ສົ່ງມອບໂຄງການໃນເວລາ 20 ເດືອນ.

ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ກ່າວ ຂອບໃຈໄປຍັງ ລັດຖະບານ ແລະ ປະຊາຊົນ ສາທາລະນະລັດ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອໃນໂຄງການດັ່ງກ່າວ ທີ່ຖືວ່າເປັນເງື່ອນໄຂພື້ນຖານທີ່ດີ ສຳລັບ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ກໍ່ຄື ຂະແໜງການເຕັກໂນໂລຊີ ແລະ ການສື່ສານຂອງ ສາທາລະນະລັດ ປະຊາທິປະໄຕ ປະຊາຊາຊົນລາວເຮົາ ໃນການສ້າງ ແລະ ພັດທະນາບຸກຄະລາກອນ ໃຫ້ມີຄວາມຮູ້-ຄວາມສາມາດດ້ານໄອຊີທີ ເພື່ອປະກອບສ່ວນເຂົ້າໃນວຽກງານການຫັນເປັນເສດຖະກິດ ດິຈິຕ໋ອນຂອງ ສາທາລະນະລັດ ປະຊາທິປະໄຕ ປະຊາຊາຊົນລາວ.

Leave a Comment