ໃນວັນທີ 02 ເມສາ 2025, ທີ່ຫໍປະຊຸມແຫ່ງຊາດ (ຫຼັກ 6) ສະຖາບັນເຕັກໂນໂລຊີການສື່ສານຂ້ໍມູນຂ່າວສານ (ສຕສ) ໄດ້ເຂົ້າຮ່ວມງານສັບປະດາດິຈິຕອນ ປະຈຳປີ 2025 ເຊິ່ງຈັດຂຶ້ນພາຍໃຕ້ຄຳຂວັນ “ພັດທະນາພີື້ນຖານໂຄງລ່າງດິຈິຕອນ ຂອງ ສປປ ລາວ ໃຫ້ເຂັ້ມແຂງ ແລະ ຍືນຍົງ”. ໃນງານຄັ້ງນີ້, ນໍາພາໂດຍ: ທ່ານ ປອ ນາງ ໃຈມາລີ ພະກະຊຸມ ຮອງຫົວໜ້າສະຖາບັນ ຕສ ຜູ້ຊີ້ນໍາວຽກວິຊາສະເພາະ ແລະ ທັງເປັນຫົວໜ້າຄະນະຮັບຜິດຊອບ, ສະຖາບັນໄດ້ມີການແນະນຳບັນດາ ຫຼັກສູດປະລິນຍາຕີ ທັງພາຍໃນ ແລະ ຫຼັກສູດຮ່ວມມືກັບສາກົນ, ຫຼັກສູດຝຶກອົບຮົມໄລຍະສັ້ນທາງດ້ານໄອທີ ຂອງສະຖາບັນ ແລະ ຫຼັກສູດຮ່ວມມືກັບບັນດາຄູ່ຮ່ວມມືພາຍໃນ ແລະ ສາກົນ. ພ້ອມນັ້ນຍັງໄດ້ມີການວາງສະແດງຜົນງານການຄົ້ນຄ້ວາດ້ານວິທະຍາສາດ, ຜົນງານບົດໂຄງການຂອງນັກສຶກສາ ແລະ ຕົວຢ່າງລະບົບຈໍາລອງ ຕ່າງໆຂອງສະຖາບັນ ຕສ ພ້ອມທັງເປີດການລົງທະບຽນຮັບເອົານັກສຶກສາຜູ້ມີຄວາມສົນໃຈຢາກເຂົ້າຮຽນ ທີ່ສະຖາບັນ ອີກດ້ວຍ.
ໃນງານຄັ້ງນີ້ຈະໄດ້ມີການສະຫຼຸບຕີລາຄາແຜນພັດທະນາເສດຖະກິດດິຈິຕອນແຫ່ງຊາດ ໄລຍະ 5 ປີ (2021-2025), ແລະ ແຜນພັດທະນາເຕັກໂນໂລຊີ ແລະ ການສື່ສານ 5 ປີ ຄັ້ງທີ III ແລະ ວາງທິດທາງ ແຜນການສໍາລັບ 5 ປີຕ່ໍໜ້າ. ພ້ອມດຽວກັນນັ້ນ, ໃນງານດັ່ງກ່າວກ່ໍໄດ້ມີກອງປະຊຸມ ສໍາມະນາລະດັບສາກົນ ໃນການຫັນເປັນ ດິຈິຕອນ ແລະ ກອງປະຊຸມວຽກງານຂະແໜງເຕັກໂນໂລຊີ ແລະ ການສື່ສານ ໃນງານດັ່ງກ່າວ ໃຫ້ເຫັນເຖິງບຸລິມະສິດ ອັນຮີບດ່ວນຂອງລັດຖະບານໃນການຫັນເປັນທັນສະໄໝເປັນຕົ້ນແມ່ນ ການພັດທະນາຊັບພະຍາກອນດິຈິຕ໋ອນ ທີ່ປະກອບດ້ວຍການຄົ້ນຄວ້າ ຂອງສະຖາບັນ ຕສ ໂດຍການຍົກລະດັບຈາກຊັ້ນສູງເປັນປະລິນຍາຕີ ເພື່ອຕອບສະໜອງຕາມຄວາມຕ້ອງການຂອງຕະຫຼາດແຮງງານດ້ານ ICT. ໃຫ້ຮູ້ວ່າວຽກງານຫັນເປັນທັນສະໄໝ ແມ່ນວຽກງານໜຶ່ງທີ່ພັກ ແລະ ລັດຖະບານໄດ້ໃຫ້ຄວາມສໍາຄັນ ເຊິ່ງໄດ້ສະແດງອອກໃນໃນມະຕິກອງປະຊຸມໃຫຍ່ຄັ້ງທີ່ XI ຂອງພັກ, ມະຕິກອງປະຊຸມຂອງສະພາແຫ່ງຊາດໃນໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນແຫ່ງຊາດໄລຍະ10 ປີ (2021-2030) ແລະ ແຜ່ນພັດທະນາເສດຖະກິດດິຈິຕ໋ອນ ແຫ່ງຊາດໄລຍະ 5 ປີ (2021-2025) ເຊິ່ງວຽກງານການພັດທະນາຊັບພະຍາກອນດິຈິຕອນ ກໍ່ເປັນວຽກໜຶ່ງທີ່ນອນຢູ່ໃນ 8 ແຜນ ຍຸດທະສາດ ແລະ 14 ແຜນງານຂອງແຜນພັດທະນາດິຈິຕອນແຫ່ງຊາດ.
ໃນງານວາງສະແດງຄັ້ງນີ້ໄດ້ສະແດງໃຫ້ເຫັນຄວາມອາດສາມາດໃນການ ຮ່ວມວາງສະແດງ ຫຼັກສູດໄລຍະຍາວລະດັບປະລິນຍາຕີ ສາຂາ ວິສະວະກໍາເຕັກໂນໂລຊີການສື່ສານຂໍ້ມູນຂ່າວສານ ແລະ ສາຂາ ວິສະວະກໍາການພັດທະນາຊອບແວ ຮ່ວມມືກັບ ມະຫາວິທະຍາໄລ ຍຸນນານ ແບບ 1+2+1 ມີທຶນການສຶກສາໃຫ້ 15 ທຶນ ຕໍ່ 1 ລຸ້ນການສຶກສາ, ຫຼັກສູດ ຝຶກອົບຮົມໄລຍະສັ້ນທາງດ້ານໄອທີ ທີ່ສະຖາບັນ ພັດທະນາຂື້ນ, ຫຼັກສູດຫົວເຫວີຍ, ຊີສໂກ, ຫຼັກສູດຮ່ວມມືກັບ ບໍລິສັດ ຮຸ່ງອາລຸນເຕັກໂນໂລຢີ ຈໍາກັດ, ອົງການ ໄນປາ ສ.ເກົາຫລີ ແລະ ຍັງມີການວາງສະແດງຜົນງານຕ່າງໆຂອງສະຖາບັນ ຕສ ດ້ານໄອຊີທີ ເຊັ່ນ: ການຕີພິມບົດຄົ້ນຄ້ວາວິທະຍາສາດລະດັບສາກົນ, ການສ້າງແບບຈໍາລອງລະບົບນໍາໃຊ້ອິນເຕີເນັດສັບປະສິ່ງ (IoT) ແລະ ບົດໂຄງການຈົບຊັ້ນຂອງນັກສຶກສາ ທີ່ມີຜົນງານໂດດເດັ່ນ ພ້ອມທັງເຜີຍແຜ່ຂໍ້ມູນລະອຽດກ່ຽວກັບການສະໜັກຮຽນໃນແຕ່ລະຫຼັກສູດ ແລະ ຮັບການລົງທະບຽນເພື່ອຮັບເອົານັກສຶກສາໃຫມ່. ທັງໝົດນັ້ນ ແມ່ນຜົນສໍາເລັດທາງດ້ານວຽກງານການສ້າງຫຼັກສູດ, ການສິດ-ສອນ, ການຄົ້ນຄວ້າວິທະຍາສາດ, ການສ້າງຄວາມເຂັ້ມແຂງໃຫ້ບຸກຄະລາກອນ ແລະ ເປັນການໂຄສະນາເຖິງ ຄວາມທັນສະໄໝ, ຄວາມຫຼາກຫຼາຍທາງດ້ານເນື້ອໃນ ແລະ ຫຼັກສູດ ເພື່ອໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງຕະຫຼາດແຮງງານດ້ານເຕັກໂນໂລຊີດິຈິຕອນ ສອດຄ່ອງກັບແຜນພັດທະນາບຸກຄະລາກອນໃຫ້ມີທັກສະດິຈິຕອນຕາມທິດສາມເສົາຄ້ຳທີ່ລັດຖະບານໄດ້ກຳນົດໄວ້