ໃນຄັ້ງວັນທີ 29 ຕຸລາ 2024, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 30 ປີ (07 ຕຸລາ 1994- 07 ຕຸລາ 2024). ໂດຍເປັນກຽດເຂົ້າຮ່ວມເປັນປະທານ ຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີກະຊວງ ເຕັກໂນໂລຊີ ແລະ ການສື່ສານ ພ້ອມດ້ວຍຄະນະນໍາ, ຄະນະພະແນກ, ພະນັກງານ, ຄູອາຈານ, ນັກສຶກສາ ພາຍໃນ ສະຖາບັນ ແລະ ແຂກຮັບເຊີນ ເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ໄດ້ຮັບຊົມການສະແດງສິນລະປະບົດຟ້ອນ, ບົດເພັງ ອວຍພອນຄູ ຂອງນ້ອງນັກສຶກສາ, ຮັບຊົມວິດີໂອເລົ່າປະຫວັດຫຍໍ້ຂອງນາຍຄູຄໍາ,ການກຳເນີດວັນຄູ ແລະ ຄວາມເປັນມາຂອງວັນຄູແຫ່ງຊາດວັນທີ 07 ຕຸລາ. ຈາກນັ້ນ, ຕາງໜ້ານັກສຶກສາໄດ້ຂຶ້ນອ່ານຄໍາອວຍພອນວັນຄູ ເພື່ອເປັນການສະແດງຄວາມຮູ້ບຸນຄຸນ ແລະ ຈາລຶກເຖິງຜົນງານຂອງຄູ ທີ່ໄດ້ເສຍສະຫຼະເຫື່ອແຮງ ປະກອບສ່ວນເຂົ້າໃນວຽກງານການສິດສອນດ້ວຍສະຕິປັນຍາ, ຄຸນງາມຄວາມດີຂອງຄູ ຕໍ່ຜົນງານການສ້າງສາ ແລະ ພັດທະນາປະເທດຊາດ ທັງເປັນການຮັກສາມູນເຊື້ອອັນດີງາມໃຫ້ຄົນລ“ຮຸ່ນຫຼັງໄດ້ເອົາເປັນແບບຢ່າງ. ນອກຈາກນີ້ ຍັງໄດ້ມີການມອບໃບຍ້ອງຍໍໃຫ້ຄູອາຈານ ຂັ້ນສະຖາບັນ ເປັນກຽດມອບໂດຍ ທ່ານ ປອ. ປະດັບໄຊ ໄຊຍະໂຄດ ຫົວໜ້າ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ມອບ-ຮັບໃບຢັ້ງຢືນການເຂົ້າຮ່ວມຫຼັກສູດຝຶກອົບຮົມ 08 ຫຼັກສູດ ຂອງບໍລິສັດຫົວເວ້ ຕາງໜ້າມອບໂດຍບໍລິສັດຫົວເວ້ເທັກໂນໂລຊີລາວ ຈໍາກັດໃຫ້ແກ່ຄູອາຈານພາຍໃນສະຖາບັນ ເພື່ອສືບຕໍ່ຖ່າຍທອດຄວາມຮູ້ດ້ານເຕັກໂນໂລຊີອອກສູ່ສັງຄົມ.
ໃນຕອນທ້າຍ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີກະຊວງ ເຕັກໂນໂລຊີ ແລະ ການສື່ສານ ໄດ້ໃຫ້ກຽດມີຄໍາເຫັນໂອ້ລົມ ແລະ ໃຫ້ທິດຊີ້ນໍາໃນການປະຕິບັດວຽກງານໃນຕໍ່ໜ້າ, ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ຂອງຄູອາຈານທີ່ຍາດມາໄດ້ ແລະ ຈົ່ງພ້ອມກັນຮັກສາມູນເຊື້ອອັນສູງສົ່ງໃຫ້ຄຽງຄູ່ກັບການສ້າງສາ,ພັດທະນາ ແລະ ຍົກລະດັບ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໂດຍສະເພາະແມ່ນແນໃສ່ຍົກສູງວຽກງານການພັດທະນາການສຶກສາ ກໍຄືການພັດທະນາຫຼັກສູດການຮຽນ-ການສອນ ໃຫ້ເປັນທັນສະໄໝ, ມີພາລະບົດບາດໂດດເດັ່ນກ້າວໜ້າ ທຽບເທົ່າພາກພື້ນ ແລະ ສາກົນ ໄປເທື່ອລະກ້າວ ແລະ ຍັງໄດ້ເນັ້ນໜັກໃຫ້ຄູອາຈານສືບຕໍ່ເອົາໃຈໃສ່ໃນການສິດສອນ, ຖ່າຍທອດບົດຮຽນ, ສຶກສາອົບຮົມນັກສຶກສາ ໃຫ້ກາຍເປັນຄົນດີຂອງສັງຄົມ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ.