ໃນຕອນບ່າຍ ວັນທີ 16 ທັນວາ 2024 ທ່ານ ປອ ນາງ ໃຈມາລີ ພະກະຊຸມ ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ນໍາພາຄະນະພະນັກງານຄູອາຈານ ແລະ ນັກສຶກສາ ຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ຕ້ອນຮັບຄະນະພະນັກງານຄູອາຈານ ແລະ ນັກສຶກສາ ຈໍານວນ 14 ທ່ານ ທີ່ເດີນທາງມາແຕ່ ມະຫາວິທະຍາໄລຢູນນານ ສປ ຈີນ.
ເປັນການສືບເນື່ອງມາຈາກ ຄະນະນໍາກະຊວງ ເຕັກໂນໂລຊີ ແລະ ການສື່ສານ ໄດ້ນໍາພາຄະນະຄູອາຈານ ສະຖາບັນ ຕສ ໄປເຂົ້າຮ່ວມຝຶກອົບຮົມ ແລະ ປະຊຸມພົບປະສ້າງຫຼັກສູດຮ່ວມກັນ ໃນທ້າຍເດືອນ ພະຈິກ 2024 ນີ້, ຈຶ່ງມີການພົບປະສອງຝ່າຍລະຫວ່າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ມະຫາວິທະຍາໄລຢູນນານ ສປ ຈີນ ຂຶ້ນຕື່ມຄັ້ງນີ້, ໃນການພົບປະໄດ້ຖືໂອກາດແລກປ່ຽນບົດຮຽນແບບແຜນວິທີການບໍລິຫານການສຶກສາ, ກິດຈະກໍານັກສຶກສາ: ນໍາສະ ເໜີຜົນງານຂອງນັກສຶກສາລາວທີ່ໄປຮ່ວມແຂ່ງຂັນລະດັບອາຊຽນ, ຜົນງານນັກສຶກສາຈີນໃນກິດຈະກໍາສໍາຄັນຂອງມະຫາວິທະຍາໄລ ແລະ ພາຢ້ຽມຊົມສະຖານທີ່ຂອງສະຖາບັນ ຕສ ຄື: ຫ້ອງຮຽນ, ຫ້ອງທົດລອງ, ຫ້ອງສະໝຸດ ແລະ ຫ້ອງນໍາໃຊ້ຄອມພິວເຕີ. ຊຶ່ງ ໃນໄລຍະພົບປະຄັ້ງນີ້, ທັງສອງຝ່າຍ ໄດ້ແລກປ່ຽນລັກສະນະສ້າງສັນຫຼາຍປະເດັ່ນສໍາຄັນທີ່ຍົກໃຫ້ເຫັນເຖິງບົດບາດຄວາມສໍາຄັນຕັດສິນ ຂອງວຽກງານໃນການພັດທະນາບຸກຄະລາກອນໃນຍຸກການຫັນເປັນດິຈິຕອນ ຕ້ອງມີຄວາມພ້ອມຮອບດ້ານ ໃນການເຂົ້າປະກອບສ່ວນໃນວຽກງານຕົວຈິງ. ພ້ອມກັນນັ້ນ, ທັງສອງຝ່າຍຈະສືບຕໍ່ລົງເລິກຜັນຂະຫຍາຍຕາມເນື້ອໃນບົດບັນທຶກຄວາມເຂົ້າໃຈທີ່ໄດ້ລົງນາມພາຍໃນຕົ້ນປີ 2024 ໂດຍສະເພາະກະກຽມຄວາມພ້ອມການຈັດຕັ້ງປະຕິບັດແຜນວຽກລະອຽດ ໃນການສ້າງຫຼັກສູດລະດັບປະລິນຍາຕີຮ່ວມກັນ ສາຂາພັດທະນາຊອບແວ, ປັນຍາປະດິດ ແລະ ຄວາມປອດໄພໄຊເບີ ໃນປີ 2025 ນີ້ ໃຫ້ປະສົບຜົນສໍາເລັດຕາມແຜນການທີ່ໄດ້ເອກະພາບ ເພື່ອເປັນການສ້າງຜົນງານຮ່ວມກັນລະຫວ່າງສອງຊາດເວົ້າລວມ, ເວົ້າສະເພາະ ເປັນການຮັດແໜ້ນຄວາມສາມັກຄີ, ສ້າງຄວາມເຂັ້ມແຂງບຸກຄະລາກອນຄູອາຈານ ແລະ ນັກສຶກສາ ຊຶ່ງກັນ ແລະ ກັນ ໃຫ້ມີຄວາມກ້າວໜ້າ, ທັນສະໄໝ ຄຽງຄູ່ກັນໄປ ຮັບປະກັນໄດ້ການຮັກສາລະດັບມາດຕະຖານສູງການພັດທະນາບຸກຄະລາກອນ ຂອງ ສອງພາກສ່ວນ ໃຫ້ມີລັກສະນະອຸດົມສົມບູນ, ຕໍ່ເນື່ອງ ແລະ ຢືນຢົງຮ່ວມກັນ.
ພາບ ແລະ ຂ່າວ ໂດຍ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ