ກອງປະຊຸມຄົ້ນຄວ້າໃນການສ້າງຫຼັກສູດທາງດ້ານໄອຊີທີ ຮ່ວມກັບມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຮ່າໂນຍ (USTH), ສສ ຫວຽດນາມ
ລະຫວ່າງວັນທີ 13 – 16 ພຶດສະພາ 2025, ທີ່ ຮ່າໂນຍ ປະເທດ ສສ ຫວຽດນາມ, ຄະນະຮັບຜິດຊອບ ຈາກສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ນໍາພາຄະນະໂດຍ ທ່ານ ປອ ນາງ ໃຈມາລີ ພະກະຊຸມ, ຮອງຫົວໜ້າ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ພ້ອມດ້ວຍຄະນະ, ໄດ້ເຂົ້າຮ່ວມ ກອງປະຊຸມຄົ້ນຄວ້າໃນການສ້າງຫຼັກສູດທາງດ້ານ ໄອຊີທີ ຮ່ວມກັບມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຮ່າໂນຍ (USTH), ສສ ຫວຽດນາມ.
ຈັດກອງປະຊຸມໃນຄັ້ງນີ້ ແມ່ນເພື່ອຜັນຂະຫຍາຍບົດບັນທຶກລົງນາມຄວາມເຂົ້າໃຈ ລະຫວ່າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ສປປ ລາວ ແລະ ມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຮ່າໂນຍ (USTH), ສສ ຫວຽດນາມ ທີ່ໄດ້ລົງນາມຮ່ວມກັນໃນປີ 2023 ແລະ ເປັນການສົ່ງເສີມທິດທາງການຫັນເປັນດິຈິຕອນຂອງປະເທດລາວ ຊຶ່ງນອນໃນແຜນຍຸດທະສາດການພັດທະນາຊັບພະຍາກອນມະນຸດ ຂອງກະຊວງເຕັກໂນໂລຊີ ແລະ ການສື່ສານ ໃນການສ້າງບຸກຄະລາກອນທາງດ້ານດິຈິຕອນ ອອກຮັບໃຊ້ສັງຄົມ ແລະ ນອນໃນ ຂໍ້ແຂງຂັນ ຮັກຊາດ ໄລຍະ 2020-2025 ຂອງ ສະຖາບັນເຕັກໂນໂລຂຊີການສື່ສານຂໍ້ມູນຂ່າວສານ ສປປ ລາວ.
ໃນກອງປະຊຸມໄດ້ມີການຄົ້ນຄວ້າລົງເລິກທາງດ້ານວິຊາການຢ່າງລະອຽດ ແລະ ເລີກເຊິ່ງ ໃນການກະກຽມຄວາມພ້ອມຮອບດ້ານເພື່ອສ້າງຫຼັກສູດຮ່ວມມືສາກົນ ທີ່ມີພື້ນຖານນໍາໃຊ້ພາສາລາວ, ອັງກິດ ແລະ ຝຣັ່ງ ທີ່ເປັນມາດຕະຖານສູງ ແລະ ມີຄຸນນະພາບລະດັບໂລກ ເພື່ອໃຫ້ມີຄວາມສອດຄ່ອງທາງດ້ານວິຊາການ, ໜ່ວຍກິດ, ລາຍວິຊາ ແລະ ລະບຽບການຂອງທັງ 02 ປະເທດ, ຄົ້ນຄ້ວາຊອກຫາແຫຼ່ງທຶນສະໜັບສະໜູນການສຶກສາ ແລະ ຂັ້ນຕອນການດໍາເນີນການສິດສອນຂອງ 2 ປະເທດໃຫ້ມີປະສິດທິພາບປະສິດທິຜົນ. ເຊິ່ງທິດທາງໃນການສ້າງຫຼັກສູດຮ່ວມກັນ ແມ່ນຢຸ່ໃນຂະແໜງການ ໄອຊີທີ ທີ່ມີການສຶກສາຮ່ວມກັນໃນຄວາມຕ້ອງການຂອງຕະຫຼາດແຮງງານດ້ານດິຈິຕອນ ທີ່ສໍາຄັນ ເຊັ່ນ: ຄວາມປອດໄພທາງໄຊເບີ, ປັນຍາປະດິດ, ການພັດທະນາຊອບແວ, ການບໍລິຫານເຄືອຂ່າຍ ແລະ ລະບົບຖານຂໍ້ມູນຄລາວ. ເປົ້າໝາຍ ແລະ ແຜນການຄາດຄະເນ ຈະມີໃຫ້ຄວາມພ້ອມເປີດຮັບນັກສຶກສາໃໝ່ ຊຸດທີ 1 ໃນສົກສຶກສາ 2026-2027 ພາຍໃຕ້ການສິດສອນຮ່ວມກັນ ແລະ ໄດ້ຮັບໃບປະກາດໃນນາມ 2 ພາກສ່ວນ.
ການຄົ້ນຄວ້າລົງເລິກດັ່ງກ່າວ ຈະເປັນການສ້າງຊື່ສຽງອັນດີງາມໃຫ້ແກ່ລະບົບການສຶກສາຂອງ ສສປ ລາວ ເວົ້າລວມ, ເວົ້າສະເພາະ ເປັນການສ້າງຫຼັກສູດ ໃນສາຂາ ທີ່ມີຄວາມສໍາຄັນຫຼາຍຕໍ່ການພັດທະນາຊັບພະຍາກອນມະນຸດໃນ ຂະແໜງການ ໄອຊີທີ ໃຫ້ມີຄວາມກຽມພ້ອມອອກຮັບໃຊ້ວຽກໃນການຫັນເປັນ ດິຈິຕອນ ແບບກຸ້ມຕົນເອງ. ເຊິ່ງນອນໃນແຜນການຍົກລະດັບສະຖາບັນ ຕສ ໃຫ້ໄດ້ຄຸນນະພາບ ແລະ ຮັບປະກັນການມີວຽກເຮັດງານທໍາຂອງ ນັກສຶກສາທີ່ຈົບໃໝ່ ແລະ ການສ້າງໂອກາດໃຫ້ພະນັກງານທົ່ວຂະ ແໜງແຕ່ສູນກາງຮອດທ້ອງຖີ່ນ ມີທາງເລືອກໃນການຍົກລະດັບຄວາມຮູ້ຄວາມສາມາດເປັນໃບປະກາດທີ 2 ຂອງຕົນ ກໍ່ຄືການພັດທະນາຕໍ່ຍອດຈາກສິ່ງທີ່ຮູ້ແລ້ວໃຫ້ຮູ້ດີຂື້ນກວ່າເກົ່າ ເພື່ອປົກປັກຮັກສາ ແລະ ພັດທະນາ ປະເທດຊາດ ຕາມຂໍ້ແຂ່ງຂັນຮັກຊາດທີ່ລະບຸມີວຽກບູລິມະສິດໃນການພັດທະນາບຸກຄະລາກອນ ທີ່ຕິດພັນກັບການພັດທະນາທຸກຂະແໜງການຢ່າງເຂັ້ມແຂງ ແລະ ຍືນຍົງ.
ນອກນັ້່ນໃນກອງປະຊຸມ ຍັງໄດ້ມີການປຶກສາຫາລື ແລະ ວາງແຜນ ໃນການຮ່ວມມືທາງດ້ານວິຊາການອື່ນໆ ເຊັ່ນ: ການສ້າງບຸກຄະລາກອນໂດຍການຝຶກອົບຮົມໄລຍະສັ້ນ, ການຊ່ວຍເຫຼືອໃນການສ້າງບົດຄົ້ນຄວ້າວິທະຍາສາດຮ່ວມກັນ ແລະ ຜັນຂະຫຍາຍການຮ່ວມມືໃນດ້ານອື່ນໃນຕໍ່ໜ້າໃຫ້ມີຄວາມຕໍ່ເນື່ອງ ແລະ ໃຫ້ມີປະສິດທິພາບ ແລະ ປະສິດທິຜົນສູງສຸດ.