📝 ສະຖາບັນ ຕສ ແລະ ພະແນກສຶກສາ ແລະ ກິລາ ນະຄອນຫຼວງວຽງຈັນ ພົບປະແລກປ່ຽນບົດຮຽນ ແລະ ສ້າງແຜນຮ່ວມມື ເພື່ອຍົກລະດັບວຽກງານດິຈິຕອນໃນຂະແໜງການສຶກສາ

ໃນຕອນບ່າຍ ວັນທີ 4 ທັນວາ 2025, ສະຖາບັນ ຕສ ນໍາພາໂດຍ ທ່ານ ປອ ປະດັບໄຊ ໄຊຍະໂຄດ ຫົວໜ້າ ສະຖາບັນ ຕສ ພ້ອມດ້ວຍສາຍຊີ້ນໍາດ້ານວິຊາການ ໄດ້ລົງເຄື່ອນໄຫວວຽກຮ່ວມກັບ ພະແນກສຶກສາ ແລະ ກິລາ ນະຄອນຫຼວງວຽງຈັນ (ພສກ ນວ).

ຈຸດປະສົງຂອງການພົບປະ

ການພົບປະໃນຄັ້ງນີ້ ມີຈຸດປະສົງເພື່ອ ແລກປ່ຽນບົດຮຽນ ແລະ ສ້າງແຜນຮ່ວມມືໃນຕໍ່ໜ້າ ກ່ຽວກັບວຽກງານສໍາຄັນຈໍານວນໜຶ່ງ, ເຊັ່ນ:

• ການສ້າງຈຸດປະສານງານ ກັບບັນດາໂຮງຮຽນມັດທະຍົມ ທົ່ວ ນະຄອນຫຼວງວຽງຈັນ ເພື່ອ ໂຄສະນາເຜີຍແຜ່ຂໍ້ມູນຫຼັກສູດ ຂອງສະຖາບັນ ຕສ.
• ການສ້າງແຜນຝຶກອົບຮົມ Training of Trainer (ToT) ໃຫ້ແກ່ຄູອາຈານສາຍສາມັນ ເພື່ອຕິດພັນກັບວຽກງານ ຫັນເປັນດິຈິຕອນ ໃນຂະແໜງການສຶກສາ.
• ການພັດທະນາສື່ການສອນ ດ້ວຍການນໍາໃຊ້ ICT (ເທັກໂນໂລຍີຂໍ້ມູນຂ່າວສານ ແລະ ການສື່ສານ) ແລະ AI (ປັນຍາປະດິດ).
• ຮັບປະກັນວຽກງານ ຄວາມປອດໄພທາງໄຊເບີ ໃນສະພາບແວດລ້ອມການຮຽນ-ການສອນແບບໃໝ່.

ຜົນຂອງກອງປະຊຸມ ແລະ ແຜນການໃນຕໍ່ໜ້າ

ຜ່ານການປຶກສາຫາລື, ທີ່ປະຊຸມໄດ້ເຫັນດີ ເອກະພາບໃນການກະກຽມຄວາມພ້ອມ ເພື່ອດໍາເນີນການ ລົງນາມບົດບັນທຶກຄວາມເຂົ້າໃຈ (MOU) ຮ່ວມກັນໃນອະນາຄົດອັນໃກ້ນີ້.

ການຮ່ວມມືລະຫວ່າງ ສະຖາບັນ ຕສ ແລະ ພສກ ນວ ໃນຄັ້ງນີ້ ຖືເປັນບາດກ້າວສໍາຄັນໃນການ ຍົກລະດັບຄຸນນະພາບການສຶກສາ ໂດຍການນໍາໃຊ້ເຕັກໂນໂລຢີທີ່ທັນສະໄໝ ເຂົ້າໃນການພັດທະນາບຸກຄະລາກອນຄູ-ອາຈານ ແລະ ສື່ການຮຽນ-ການສອນ, ເພື່ອສອດຄ່ອງກັບຍຸກດິຈິຕອນ.