ໃນຕອນເຊົ້າຂອງວັນທີ 1 ກັນຍາ 2023, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ໄດ້ຈັດພິທີມອບໃບປະກາສະນີຍະບັດໃຫ້ແກ່ນັກສຶກສາຮຸ່ນທີ 39 ທີ່ຈົບການສຶກສາລະດັບຊັ້ນສູງ ໃນຂະແໜງວິສະວະກຳເຕັກໂນໂລຊີຂໍ້ມູນຂ່າວສານ ແລະ ວິສະວະກຳເຕັກໂນໂລຊີການສື່ສານຈຳນວນທັງໝົດ 99 ຄົນ, ຍິງ 49 ຄົນ. ໃຫ້ກຽດເປັນປະທານ ແລະ ມອບໃບປະກາສະນີຍະບັດໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ.
ພ້ອມນັ້ນຄະນະນຳສະຖາບັນ ນຳໂດຍ ທ່ານ ປອ. ປະດັບໄຊ ໄຊຍະໂຄດ ຮັກສາການຫົວໜ້າ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ຄະນະພັກ, ຄະນະກົມກະຊວງເຕັກໂນໂລຊີ ແລະ ການສື່ສານ, ຄູອາຈານ-ພະນັກງານ ແລະ ນັກສຶກສາ ກໍ່ໄດ້ເຂົ້່່ຮ່ວມຊົມເຊີຍສັນລະເສີນ ຜົນສຳເລັດໃນຄັ້ງນີ້ ຢ່າງພ້ອມໜ້າ. ພາຍໃນງານ, ທ່ານ ປອ. ປະດັບໄຊ ໄຊຍະໂຄດ ໄດ້ກ່າວລາຍງານໝາກຜົນການຈັດຕັ້ງປະຕິບັດວຽກງານການຮຽນ-ການສອນຕະຫຼອດໄລຍະ 1 ປີທີ່ຜ່ານມາ ແລະ ແຜນປະຕິບັດວຽກງານໃນ 1 ປີຕໍ່ໜ້າ ຂອງ ສະຖາບັນ.
ສຸດທ້າຍ, ພາຍໃນງານຍັງໄດ້ຮັບຄຳໂອວາດຈາກ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ທີ່ມີເນື້ອໃນເລິກເຊິ່ງ ແລະ ມີຄວາມໝາຍຄວາມສຳຄັນສຳລັບສະຖາບັນ. ທ່ານ ລັດຖະມົນຕີ ໄດ້ຍົກໃຫ້ເຫັນເຖິງ ແກ່ນແທ້ຂອງວຽກງານການພັດທະນາບຸກຄະລາກອນ ໂດຍສະເພາະໃນຂະແໜງການເຕັກໂນໂລຊີ ແລະ ການສື່ສານ ເຊິ່ງ ຖືເປັນໜຶ່ງໝາກຫົວໃຈຫຼັກຂອງວຽກງານການຫັນເປັນດິຈິຕອນຂອງຊາດເຮົາ, ເຫັນໄດ້ເຖິງຄວາມສຳຄັນດັ່ງກ່າວ ທ່ານໄດ້ກ່າວເຖິງ ການຕັດສິນໃຈຂອງຄະນະນຳກະຊວງ ໃນການຍົກລະດັບສະຖາບັນ ໃຫ້ທຽບເທົ່າມະຫາວິທະຍາໄລ ໃນຕໍ່ໜ້າ. ພ້ອມນັ້ນ ທ່ານ ລັດຖະມົນຕີ ຍັງໄດ້ເນັ້ນໜັກໃຫ້ບັນດານັກສຶກສາທີ່ຈົບໃໝ່ ສືບຕໍ່ຜັນຂະຫຍາຍມູນເຊື້ອອັນດີງາມ ແລະ ເອົາໃຈໃສ່ປະກອບສ່ວນຮອບດ້ານເຂົ້າໃນວຽກງານການພັດທະນາເສດຖະກິດ-ສັງຄົມ ໂດຍສະເພາະ ບັນດາວຽກງານທີ່ຕິດພັນກັບການຫັນເປັນທັນສະໄໝ ໃນທຸກຂົງເຂດວຽກທີ່ຕົນເອງຈະຮັບຜິດຊອບ ໃນອະນາຄົດຕໍ່ໜ້າ.